 |
23. - 30. mai 2010 |
 |
|
FolkemusikkgudstenesteÅl kyrkje har fått stønad frå Norsk Kulturråd til eit treårig prosjekt, der det skal bli brukt folkemusikk i sundagens gudstenester. For kyrkja er det viktig å byggje på røter og tradisjonar i bygda og på den måten finne funksjonelle og varige koplingar mellom folkemusikk og gudstenesteliturgi. Kyrkja ynskjer å spele på lag med lokale musikarar, slik at det kan stimulere både kultur- og kyrkjeliv i bygda. Det er og eit mål å inspirere andre kyrkjer og lokalsamfunn til å gjera det same. Til no har det vore nesten to år med folkemusikkgudstenester, og mange utøvarar har vore involvert. Religiøse folketonar blir nytta til salmesong og solo. Det har vorte brukt folkemusikk til pre- og postludium, takkoffer- og nattverdmusikk. Fele, trekkspell, lur, bukkehorn, langeleik, kantele, kveding, seljefløyte og andre fløyter fell naturleg inn mellom orgeltonar og liturgiske ledd. Kyrie, Gloria ph Sanctus har vorte erstatta med melodiar av Jo Asgeir Lie. Gloria i pols og Sanctus i gangar indikerer at det er rom for fleire taktartar under kyrkjetaket. Prosjektet vekkjer interesse langt utover bygda, og både lokalt og nasjonalt har responsen til no vore overveldande og samstemt. Seminar 19. og 20. mai. Under folkemusikkveka blir det eit seminar om Folkemusikk og Gudsteneste. Me trur det er interessant både for utøvande folkemusikarar, organistar, prestar og andre. Det er viktig å gjera innhaldet praktisk og matnyttig, slik at det blir ein plass å hente impulsar og til å utveksle idear. Åge Håvik, Knut Reiersrud, Iver Kleive og Carl Petter Opsahl er gode tilreisande namn. Elles får me høyre Jo Asgeir Lie, John Storhaug, Audun Flaen, Bergljot Kaslegard Nordal, Vigdis Moen Storhaug, Olav Luksengård Mjelva og Tor Egil Kreken. Og det blir sjølvsagt ei folkemusikkmesse! Vigdis Moen Storhaug er prost i Hallingdal prosti, og sokneprest i Ål. Vigdis vart utdanna som cand. theol frå Menighetsfakultetet i 2001 og ho har tidlegare brei erfaring frå arbeid i kyrkja og i sokneråd, i tillegg til praksis som organist/musikkarbeidar, vikarlærar, gravferdskonsulent og til å rettleie teologistudentar i praksis. Carl Petter Opsahl er prest, jazzmusikar og journalist. Han spelar klarinett og der fann han fann han sin blå tone, som han sjølv seier. Ein tone der klangen frå creolske klarinettistar, klezmermusikk, calypso og gudbrandsdalsmusikk flyt saman. Han har eit mål om å fordjupe seg i den hellige blå tonen, og bringe den vidare. For tida er Carl Petter prest i Kirkens Bymisjon, jazzanmeldar for VG, held foredrag og forelesningar rundt om i verda, i tillegg til å arbeide med doktergrad om religiøse straumar i hiphopkulturen. Audun Flaen er kyrkjemusikar og har utdanning ved Norges Musikkhøgskole. Han arbeider til dagleg som organist i Ål. Audun er sentral i prosjektet Folkemusikk og Gudsteneste, der det blir lagt vekt på samspel og samarbeid på tvers av stilartar. Han har også erfaring med å arrangere ulik kyrkjeleg bruksmusikk. Jo Asgeir Lie er rektor i Ål kulturskule, i tillegg til å vere frilans musikar, komponist og arrangør. Han er utdanna ved Norges musikkhøgskole med klassisk trekkspel som hovudinstrument, Jo Asgeir bur på Ål, og er ein allsidig musikar som skriv og arrangerer musikk for ulike samansetjingar. Han har skrive musikken til messeledda til folkemusikkgudstenesta. Tor Egil Kreken kjem frå Ål, og er i dag ein frilansmusikar med heile verda som arbeidsstad. Instrumenta hans er bass og banjo. Han spelar med ei rekkje band, og artistar, mellom anna Maria Solheim, Wibutee, Stein Torleif Bjella og ikkje minst The Holstein United Bluegrass Boys. Olav Luksengård Mjelva er frilanse musikar, og spelar både fele og hardingfele. Olav har røter frå Ål, men bur på Røros. Han spelar i mange ulike grupper, held kurs både i inn- og utland, og er i tillegg mykje brukt som studiomusikar. I fjor vann han A-klassa i hardingfele på landskappleiken, i tillegg til Fanitulltevlinga og å bli Nordisk Meister! |
||
 |
|
|
Utvikla av BeWide Technologies
Publisert med WideCMS